اتربيت علي ان الكمة بيني و بين حد تاني تعتبر عقد حتي لو مش كاتبينه ، و الغريب في الموضوع اني لقيت ناس كتير بتنتقدني اني بلتزم بكلمتي ، و اكيد مش قصدي اني متربي احسن منهم او انهم اوحش مني ، بس برضو اكيد في حاجة غلط ، و ده بان ليا في موقفين الاول لما استأذنت المدير بتاعي في الشغل علشان اخد يومين اجازة و بالمرة اخد كام واحد من الشركة يغير جو معايا و اني ارجع السبت الصبح علي ميعاد الشغل ، و حصل في الامور امور و لقيتهم بيترجوني اني امد يوم كمان فالطبيعي اني قلتلهم مش هاينفع لاني ملتزم بكلمة مع المدير ، فجأة لقيت نقد شديد بينهال عليا من كل مكان و كأني سرقت حاجة منهم ، و كلهم زعلو مني و علشان يحلو الموقف كلمو المدير علشان يستأذنوه اني افضل معاهم ، و فعلا المدير وافق و كله تمام بس انا حسيت اني لازم التزم بكلمتي و اصريت اني امشي في ميعادي ، الموقف التاني و هو الاهم لما رحت اتقدم لبنت و تقريبا اتفقنا علي كل حاجة ، و بعدها بشوية ايام لقيتهم بيرجعو في الاتفاقات فقلتلهم احنا مش اتفقنا علي كل حاجة !!! ، قالو اه اتفقنا بس مافيهاش حاجة لو رجعنا في كلامنا ماهو كل الناس بيرجعو في اتفاقهم ، طبعا الكلام ماعجبنيش و الموضوع ماتمش ، الخلاصة : هو لسة الكلمة عقد بين الناس وللا الموضوع بقي كله ورقة و قلم ، و الوعد اللي بين الناس لو ماكنش مكتوب و موثق يبقي مش وعد !!! ، اظن مافيش احسن من كلام النبي في الحديث المشهور :
( آية المنافق ثلاث إذا حدث كذب , وإذا وعد أخلف , وإذا اؤتمن خان ) .
