توضيح

آسف لإنقطاعي المفاجئ

و إن شاء الله هابقي أوضح الأسباب

في السجل التجاري

كنت في مشوار تبع الشغل بخلص فيه ورق من السجل التجاري فقمت بدري و بدأت اليوم ، دخلت السجل و قلت للموظف بتاع الاستقبال علي الطلب بتاعي قال : روح اضغط علي الزرار اللي هناك ده و خدلك رقم ( قلت مش مشكلة يمكن الموظف التاني غايب و نشيل بعضنا برضو ) خدت رقم 3 ، دخلت الخزنة فقال : عايزين 4 جنيه ،ماكنش معايا غير 5 جنيه مجمدة ، فقال : معلش مش معايا فكة ( قلت جهة حكومية و مافيهاش فكة !!!!! مش مشكلة شوية و تجيله فكة و آخد الباقي و انا ماشي ) ، مالقيتش غير واحدة قاعدة معايا في قاعة الانتظار و شوية وجالها تليفون و اول ما خلصته لقيتها بتكلم نفسها و بتشاور بإيدها فبصيت حوليا مالقيتش غيرنا فبدأت اقلق ، و فجأة لقيتها اتنطرت من مكانها فاتخضيت و علشان الاحراج عملت نفسي اني لقيت حاجة ماشية تحت الكرسي ، و بعد انتظار كتيييير لقيت الكمبيوتر بينادي علي الرقم بتاعي قمت بسرعة للموظفة لقيتها بتقول : معلش اصلي بعمل تفريغ لبيانات الكونيكت ( مافهمتش يعني ايه بصراحة المهم انها مش شتيمة ) و رجعت مكاني ، بعد شوية كتيييرلقيتها بتنادي علي اسامي ( امال الرقم لزمته ايه !!! ) قعدت اسمع الاسامي مالقيتش الاسم بتاعي ، المشكلة ان البنت اللي كانت معايا مشيت و ماكنش في غيري ، و الست اللي بتنادي علي الاسامي بتبصلي بعد كل اسم ، قلت اريحها و اقوم اقولها علي الاسم بدل ما تتعب نفسها ، لقيتها بصتلي من تحت النظارة و قالت : ماتقعد مكانك يا استاذ ، رديت برخامة : اصلي مش لاقي مكان اقعد فيه ، رجعت مكاني بدل ما تعورني وللا حاجة ، شوية و راجل قعد معايا في القاعة و ماستناش كتير و الكمبيوتر اشتغل تاني و قال رقم 6 ، الراجل قام ( قلت يا حرام بيشتغلوالراجل و هايبقي شكله وحش ) لقيته خلص الورق بتاعه و مشي ، اتضايقت جدا و قلت ادور علي الكاميرات (يمكن تطلع الكاميرا الخفية ) ، قلت اطلع المصحف و اختم كام ختمة او اسبح كام الف تسبيحة لأن شكلها هاتطول ، و لقيت اسمي بيتقال ( هي عرفت اسمي منين !!! ) رحت اشوف لقيتهم بيندهو علي الساعي و اسمه زي اسمي ، قلت لا بقي انا اركب الوش الخشب و اروحلها و فعلا جاب نتيجة و بدأت تخاف مني ، قلتلها اني قاعد بقالي كتيييير و انا كده اتأخرت ، دورت علي الاسم في الورق اللي قدامها و لاقته ، و بدأت تتكلم بصوت واطي : معلش اصلي حلفت اني مش هنادي علي اسامي تاني لأن زميلتي دي مستخسرة تستخدم الكمبيوتر ، و قعدت تحكيلي المأساة اللي عايشاها مع زميلتها ، و اخيرا خلصت الورق بعد اليوم ما ضاع ، بس يمكن اكون استفدت حاجة اني ماحكمش علي الناس قبل ما اعرف الظروف اللي خلتهم يعملو كده و اني اعمل حسابي بعد كده و اخد معايا كيلو لب و فول لزوم التسلية .

ثانوية عامة

انا عارف ان العنوان و الصورة ممكن يدلو علي حاجة تانية خالص غير اللي انا اقصدها ، اكيد اول حاجة هاتخطر في بال اللي بيقرأ هي الدراسة و الامتحانات و المشاكل و الحلول و غيروووووو ، بس انا اقصد حاجة تانية خالص و هي اننا نعيش في ثانوية عامة ، بمعني اننا نكون هامشيين و طبعا ده ماينطبقش علي كل الناس بس للاسف كتير مننا ، فتلاقي حواليك ناس تعرفهم طريقة تفكيرهم سطحية و مالهاش قيمة و لو حبيت تاخد رأيهم تلاقي مالهمش رأي و لو لهم رأي يخلّوك تندم انك سألتهم علي رأيهم او انك عملت بيه ، و النوع التاني من الناس ( و اللي عندهم ثانوية عامة برضو ) تلاقيهم عايشين لواحدهم و مالهمش دعوة بغيرهم و دول اللي بيتقال عليهم ( معاهم معاهم عليهم عليهم ) يعني لو عندك مناسبة سعيدة تلاقيهم يادوب بيباركو حتي لو في ايدهم يساهمو في الفرحة دي و يكبروها ، و لو عندك مصيبة تلاقيهم يادوب بيعزّو حتي لو في ايدهم يوقفوها او يقللو المصيبة دي ، و للاسف مشكلة الناس دي انهم سلبيين و بيضيعو حقوقهم بأيديهم ، و طموحهم كله انهم يعيشو و خلاص و شعارهم اللي بيرفرف قدام عينهم هو ( و انا مالي ) و ده اللي بيسموه ( الأنامالية) يعني طالما انا عايش كويس ماليش دعوة بغيري و لو حد حاول ياخد حاجة بتاعتي غصب عني اقول مش مشكلة عندي غيرها و بينسي حاجة مهمة جدا و هي ان اللي خد الحاجة دي ممكن يكرر عملته طالما مالقاش اللي يقفله و ساعتها ممكن تيجي مع حد تفرق معاه لدرجة الحياة او الموت ، و عارف ان في ناس هاتفتكر اني بتكلم السياسة ، لأ طبعا لأن الاهم من السياسة بالنسبة ليا هو احنا نفسنا ( ديننا ، اخلاقنا ، تقاليدنا ) ( ولادنا ، اخواتنا ، اهلنا ، جيرانا ) ( شارعنا ، قريتنا ، مدينتنا ، مجتمعنا ) ، الخلاصة : ( من اهم اساليب الدعوة الي الله هو التخلّي عن الثانوية العامة و الأنامالية ، و معرفة طبائع الناس و كيفية الدخول الي قلوبهم قبل بيوتهم ) .

زي ظلك

اكيد سمعنا الكلمة دي قبل كده ، و ممكن نكون سمعناها من اقرب الناس لينا خصوصا لما تلاقي حد بيحاول يطمنك انه معاك و انه واقف جنبك فتلاقيه يقولك : ماتقلقش هاتلاقيني زي ظلك ، و الكلمة دي خلتني افكر في الموضوع بشكل مختلف شوية في موضوع العلاقات بين الناس ، و لقيت ان في سبب يعتبر من اهم اسباب وقوع المشاكل و الخلافات بين الناس و هو انهم زي ظلنا ، بمعني اننا كتير بنعامل الناس بطريقة معينة وبنبقي عايزينهم يعاملونا بنفس الطريقة او انهم يردو المعالة دي بعاملة زيها ، و من هنا بتبدأ المشاكل لاننا ببساطة بنحط نفسنا مكان اللي قدامنا في الموقف اللي بيتعرضله و بنشوف كنا هانتصرف ازاي و طبعا لان كل واحد مننا شايف نفسه مافيش زيه و انه بيتصرف بمثالية فبيبقي عايز اللي قدامه يعامله بنفس الطريقة ( المثالية ) ، و هي دي فكرة الظل ، ان اغلب الوقت الظل بتاعك مابيكونش قدك بالضبط فمرة تلاقيه اكبر منك و مرة تلاقيه اصغر منك و الوقت القليل اللي بيكون قدك بيكون واخد شكل الارض اللي مرسوم عليها فلو في طوبة في الارض و لو صغيرة هاتلاقي ظلك مرسوم علي الطوبة دي و مغير شكل الظل كله ، علشان كده ماتستناش من الناس انهم يعاملوك زي ما انت بتعاملهم او علي الاقل ماتتوقعش ان ده يحصل كتير و ده ببساطة لان الناس بالنسبة ليك
( زي ظلك ) .

كام كلمة

كلمة واحدة
ـــــــــــــــــ

المسؤولية

كلمتين
ــــــــــ

الإحساس بالمسؤولية

ثلاث كلمات
ــــــــــــــــــــ

الإحساس بالمسؤولية نعمة

أربع كلمات
ـــــــــــــــــــ

الإحساس بالمسؤولية نعمة أتمناها

خمس كلمات
ـــــــــــــــــــــ

الإحساس بالمسؤولية نعمة أتمناها و ماطلبهاش

تربية بنات

الكلمة دي سمعناها كتير علي الشباب المتربي كويس ، و الناس ماكنتش بتلاقي كلمة معبرة زيها ، فتلاقي الشاب زي الحيطة و بيتقال عليه متربي تربية بنات ، بس للاسف في ناس بتفهم ده غلط و بتقدره بطريقة مش حلوة و ممكن تتجرم ده لضعف في الشخصية او عدم الاحساس بالمسئولية ، و ده خلاني افتكر واحد من زمان كان في فترة الخطوبة و كان فاكر ان اخلاقه و تربيته هاتعجب اي حد ، بس للاسف اتفاجئ ان مش كل الناس زي بعضها و خطيبته بدأت تعايره و لو بهزار و بدأت تحس انه ماعندوش خبرة في الحياة لمجرد انها شايفاه متربي كويس ، و كانت فاهمة انه علشان ماكلمش بنات قبلها مثلا انه بكده يبقي خايب و مش هايعرف يتعامل معاها و النتيجة الطبيعية للموقف ده ان الخطوبة اتفشكلت ، و اكيد البنت دي مش قاعدة عامة زي ما الولد ده مش قاعدة عامة برضو ، و المشكلة الاكبر ان الناس كانو بيقولو تربية بنات لان تربية البنات المفروض تكون غير تربية الولاد و خصوصا في المجتعات الشرقية و مايعرفوش ان حتي تربية البنات ماعدتش زي الاول ( ده طبعا مش عند كل الناس و البيوت المحترمة لسة موجودة ) ، و للاسف الراجل بقي يمشي جنب بنته و هي لبسها مدخلاه في جسمها بصابونة و الناس كلها بتتفرج عليها ، و بقي عارف علاقتها بالشباب بحجة انها صداقة بريئة ( و طبعا ده مالهوش اصل في الدين و لا حتي في التقاليد بتاعتنا ) ، فبيقنا نلاقي شباب متربي احسن من تربية البنات ، و ابقي بكدب علي نفسي لو قلت ان الناس دي مش عارفة اصول التربية لان كلنا عارفين الصح و الغلط ، بس يا تري بنت زي دي هاترضي تاخد شاب متربي تربية بنات ؟ و لو الشاب ده خد بنت متربية زيه هاتبقي واثقة فيه انه يقدر يواجه الحياة ؟ ، ياريت تكون دي النسبة القليلة و نرجع تاني تربية البنات و اللي طبعا بتعتمد علي الأهل و زي ما قالو : ( إذا كان رب البيت بالدف ضارب فشيمة أهل البيت الرقص ) .