كلمة و نص ...(3)

الموضوع ده فيه كلام لعلماء ، او كلام لحكماء ، او كلام لنفسي فهمته منهم :

1- لا تشمت بأخيك فلعل الله سقاه بهذا البلاء دواء استخرج به منه داء قاتلا هو فيك و انت لا تشعر .
2- اعلم ان الله سبحانه وتعالى يمهل كأنه يهمل ، فترى أيدي العصاه مطلقة كأنه لا مانع ، ثم إذا أخذ أخذ أخذ جبار (ابن الجوزي ) .
3- لن تصح لك عبودية مادام لغير الله فيك بقية .
4- ما امر الله امرًا الا و للشيطان فيه نزغتان اما الي تفريط و تقصير و اما الي مجاوزة و غلو .
5- ان الشيطان يريدك ان تيأس ، فكلما و قعت في شرك المعاصي قم و انفض ثوبك تعلو عند الله .
6- الجماعة ما كان علي حق و لو كنت وحدك .
7- ان من اكبر معاصي القلوب ان تعلم ان به خبث مع علمك باطلاع الله عليه مع عدم تغيير ما في قلبك .
8- لإن أُعافي فأشكر خير لي من ان أُبتلي فأصبر .
9- الخُلُق كل الدين فمن نقص خُلُقه نقص دينه .
10- عليك بطُرُق الهدي و لا يوحشنك قلة السالكين ، و اياك و طُرُق الضلالة و لا يغرنك كثرة كثرة الهالكين .
11- سموم القلب الضارة : فضول الطعام ، فضول المنام ، فضول الكلام ، فضول مخالطة الانام .
12- من اهم مبادئ الدعوة : قم الي رغيفيك فاحرزهما ثم انصب قدميك للعبادة .
13- انت الذي كل الذي *** لو كنت تفعل ما تقول .

فضفضة

كلنا بيجيلنا وقت بنحب نقعد فيه لوحدنا و مابنبقاش عايزين نتكلم مع حد ، و بنحس في وقت تاني اننا مش طايقين نقعد لوحدنا و بندور علي حد نتكلم معاه و نقول له علي اللي جوانا ، و الاحساس ده ممكن ييجي في اي وقت و من غير ميعاد بس بيزيد اوي في مواقف معينة ، منها لما بنبقي فرحانين و عايزين نطلع اللي جوانا لان الموضوع ممكن كون اكبر مننا و الفرحة مش سايعانا ، و ممكن بنحتاج نفضفض لما بنبقي متضايقين و حاسين بخنقة و مش قادرين نستحملها لوحدنا فبنبقي عايزين نشارك همنا مع حد ، بس الفرق بين الفضفضة في حالة الفرح و في حالة الخنقة او الزعل هو الشخص اللي بنفضفضله ، لان في ناس بتتحملنا في وقت الفرح بس و ممكن تبقي اسعد مننا ، بس لما تيجي تشكيلهم او تشاركهم في مشاكلك تلاقيهم مش مستحملينك و مش عايزين يعرفوك بحجة ان اللي فيهم مكفيهم و يمكن الكلمة المعبرة عن كلامي ده كانت في رسالة واحد صاحبي بعتهالي بيقول فيها : ( جزي الله الشدائد كل خير عرفت بها من عدوي من صديقي ) ، و انا يمكن اتكلمت عن حالتين بس للفضفضة لان هما اهم حالتين من وجهة نظري ، بس في حالة تعتبر خطيرة جدا و هي ان حد يفضفض مع حد و يشتكيله من غيره و للاسف مابيقدرش يمسك نفسه و بيدخل في دايرة الغيبة و النميمة لانه بيبقي في الوقت ده مكسور وحاسس انه مظلوم و بيبقي فاكر انه لما يقعد يقطع في غيره و يطلع كل عيوبه انه بكده جبر كسره و مايعرفش ان دي تبقي غيبة و نميمة و بدل ما كان بيفضفض علشان يرتاح بقي بيفضفض علشان يغضب ربنا و مايعرفش انه بكده استحاله يكون مرتاح و لو حس انه مرتاح بيبقي مهموم لانه عامل زي اصابة اللعيب مابيحسش بوجع الخبطة و خطورتها غير بعدها بفترة ، علشان كده نصيحتي للي بيفضفضو انهم يبعدو عن الغيبة و النميمة و يبطلو يجيبو في سيرة الناس و مافيش احسن من حديث النبي ( صلي الله عليه و سلم ) لما علمنا ذكر نكفر بيه اللي قلناه في المجلس و هو : ( عن أبي هريرة رضي الله عنه قال : قال رسول الله صَلّى اللهُ عَلَيْهِ وسَلَّم : « مَنْ جَلَسَ في مَجْلس فَكثُرَ فيهِ لَغطُهُ فقال قَبْلَ أنْ يَقُومَ منْ مجلْسه ذلك : سبْحانَك اللَّهُمّ وبحَمْدكَ أشْهدُ أنْ لا إله إلا أنْت أسْتغْفِركَ وَأتَوبُ إليْك : إلا غُفِر‏َ لَهُ ماَ كان َ في مجلسه ذلكَ » رواه الترمذي ).

البخيل وانا

كنت جايب عروسة لواحد صاحبي و بصراحة هو مش صاحبي اوي فامكنتش اعرف كل صفاته ، فلقيته بيقوللي في مرة و انا ماشي معاه انه راح لعروسة قبل كده و ماحصلش نصيب ، فحبيت اعرف السبب فلقيته بيقوللي : اصلي ادبست في عزومة ليها هي و بنت عمها ، فقلتله ازاي ، قال : اتفقنا نتقابل و نقعد بره البيت فرحنا النادي و قعدنا و طلبنا مشاريب فلقيتهم طلبو كابتشنو ( انا قلت في نفسي امال انت عايزهم يطلبو ايه حلبة حصا ؟!!! ) ، فكمل كلامه و قال : هو من اولها كابتشينو شكل الجوازة دي مش نافعة ، فقلتله : ليه هما طلبو ايه كمان ( و عملت نفسي متأثر و متعاطف معاه ) ، قال : و انت عايزهم يطلبو ايه كمان ؟ ، ده انا حتي اختصرت معاهم في الكلام علشان نقوم نمشي بس للاسف كنت ادبست خلاص ، فسألته : و ادبست في كام علي كده ؟ ، قال : 15 جنيه ( و حسيت بالصاعقة ) قلتله و انا ماسك نفسي : بس 15 جنيه مش كتير علي الفرد اليومين دول وللا انت شايف ايه ، قال : فرد ايه ؟ بقولك احنا التلاته 15 جنيه يعني الواحد 5 جنيه ، و بصراحة لقيت نفسي بلغي موضوع العروسة اللي كنت جايبهاله و بدأت افكر ، ان حتي البخيل في المناسبات دي بيصرف و مابيحسبهاش فمابالكم بواحد مستخسر في مناسبة زي دي ، و حبيت ابص للموضوع بشكل تاني ، و بعد ما كنت بعاتب الاهالي انهم بيعقدو الشباب بطلباتهم الكتير ، بس لقيتني كنت ظالم بعض الاهالي ، و ان فعلا في شباب مش وش جواز و مش مؤهل لده ، و فاكر ان الحياة بعد الجواز زيها زي حياة العزوبية ، و مش قادر يفرق ما بين البخل و الحرص ، و مايعرفش ان الحريص بيدفع و ممكن يبقي كريم بس الفكرة كلها انه بيدفع فلوسه بعد ما بيحسبها و في المكان الصح ، انما صاحبنا ده مش عايز يدفع حتي في اكتر المواقف اللي المفروض يصرف فيها ، علشان كده بعتذر للاهالي و بعتذر اني اعترضت علي كلام واحدة قالتلي : اللي مش قد الجواز مايتجوزش ، و نصيحتي للشباب انهم يبحبحوها شوية و يخلو المينيمام تشارج بتاعهم 6 جنيه و ربع بدل 5 جنيه ، و بالنسبة للبنات يبطلو شرب الكابتشينو و ده دور الاهالي بأنهم يربو بناتهم ان الكابتشينو ده حاجة عيب و ماتصحش .

كلمة و معنى

لاحظت ان الناس بتحاول تعمل حاجات و تغير اسمها علشان تخليها حلوة في عينهم و يمكن مالقتش احسن من كلمة التزيين اللي بتوصف اللي احنا بنعمله ، و كلمة التزيين دي موجودة في ( و زيَّن لهم الشيطان اعمالهم ) فلقيت الناس بتعمل حاجات غلط و غريبة و تخلي اسمها حلو ( او العكس ) و بيبقو متخيلين و واهمين نفسهم ان الاسم لما يتغير يبقي الفعل هو كمان بيتغير ، و دي شوية كلمات الناس اخترعتها علشان تبرر افعالها و مواقفها ،
بس المهم لو عايز تفهم الكلام صح شيل ( _ ) و حط كلمة ( مش ) :

( خيانة _ تجربة )

(البعد عن ربنا _ حرية شخصية )

( القرب من ربنا _ تطرف )

( الموسيقي _ غذاء الروح )

( ماعدش بيسمع كلام اهله _ عنده شخصية )

( جيفارا الملحد _ رمزالتصحيح و الانسانية )

( الربا _ ارباح )

( متربي _ بتاع ماما )

( الزنا _ جواز.....عرفي )

( ملتزمة في لبسها _ تخلف و رجعية )

( لابسة من غير هدوم _ موضة و اناقة )

( لابس سلسلة و مفلفل شعره و مسقط البنطلون _ روشنة و استايل )

( نصب و فلوس حرام _ شطارة و تشغيل مخ )

( السجاير _ تنفيس هم )

( اعجاب و وهم _ حب )

( كدب و نفاق _ لباقة )

( شتيمة و قلة ادب _ ابداع )

( جدار فولاذي _ حصار و عداوة )

( علاقة العرب بمصر _ اخوة و امومة )

( المغالاة في المهور و طلبات الجواز _ ضمان لمستقبل البنت )

( دكاترة نفسيين مابيسمعوش المريض _ طب نفسي )

مش قلتلك لو عايز تفهم الكلام صح حط كلمة ( مش ) مكان ( _ ) اللي بين الكلام .

اول زيارة

جه عليا اول يوم جمعة و انا في الجيش ( ايام ما كنت في الجيش) و يوم الجمعة كان اجازة و الناس بتيجي زيارة لولادها اللي في الجيش ، و زي كل الشباب اللي في مركز التدريب كان احساسنا اننا مش هانشوف ناس من بره الجيش غير بعد سنة علي الاقل ، و جت الفرصة اني اشوف الناس دول و قلت استلف تليفون من ا حد و اطمن عل اهلي و فعلا رحت ارض الزيارة مع زمايلي و بدأت اشوف ناس من جديد و الاهالي بيسلمو علي ولادهم و دموع الفرح مغرقاهم ، فاشتقت اكتر اني اسمع صوت اهلي و خصوصا اني كنت قايلهم مايجوش يزوروني ( علشان مايتعبوش نفسهم ) ، و فعلا لقيت واحد جابلي تليفون من اخوه و ماصدقت اتصل بأهلي ، خدت التليفون و اتصلت بس للاسف ماحدش رد ، فقلت اكلم اخويا و اشوف ايه الموضوع ، رد عليا و قاللي انه قاعد مع ابويا في البيت علشان امي جتلي زيارة ، ماعرفتش اعمل ايه من المفاجأة ، بصيت في الساعة لقيت الوقت بيجري و معدش غير ساعة و ربع قبل الزيارة ما تخلص ، و بدأت ادور في وشوش الناس و اللي كانو بالآلاف و قلبي بيدق و بدأت اتحرك في المكان و اروح و اجي فيه و انا بدور ، و فجأة عيني وقعت علي واحدة من بعيد و حسيت انها امي ، جريت عليها و اتأكدت انها هي و الفرحة مش سايعاني ، رحتلها و خبطت علي كتفها و بصتلي بشكل اول مرة اشوفه في عينها و مش قادر اوصفه و اترميت في حضنها و هي مفتوحة في العياط ( بصراحة ماقدرتش امسك نفسي و اتفتحت في العياط انا كمان ، و كنت اول مرة اعرف معني دموع الفرحة ، و بعد ما هدينا اطمنت منها علي ابويا و خدت تليفونها و كلمته و اطمنت عليه ، و لان الاوقات الحلوة بتعدي بسرعة لقيت الساعة عدت كانها ثانية و الزيارة خلصت و اتقلبت دموع الفرحة لدموع حزن و فراق ، و ساعتها بس عرفت قيمة النعمة اللي انا فيها ، و عرفت قيمة ان ابوك و امك يكونو راضيين عنك و بيدعولك ، و خدت نفس كبيييير و رجعت تاني للحياة العسكرية بس المرة دي و انا مطمن شوية ،
نصيحة : ( اعرف قيمة النعمة و هي بين ايدك قبل ما تروح منك ، و احمد ربنا عليها و حافظ عليها ، و خد بالك ان النعمة لو زالت مش كلها بيرجع تاني ) .

نعاتب و نسامح

لاحظت كام نوع من الناس ، ناس بتسامح من غير ما تعاتب ، و ناس بتعاتب و بعدها تسامح ، و ناس مابتسامحش سواء بعتاب او من غير عتاب ، بس لما جيت افكر في موضوع التسامح ده لقيته صعب اوي عند ناس معينة ،
و بتلاقيهم شايلين جواهم و مش قادرين ينسو بسهولة و ماببقاش عارف هما مش قادرين يسامحو مثلا لان حد غلط فيهم جامد اوي و للا علشان مش قادرين يسامحو اصلا ؟ ، بس السؤال الاهم هو ينفع اسامح بس افضل فاكر الموضوع و شايله جوايا ؟ و للا اللي بيسامح لازم ينسي كل حاجة ؟ ، و بصراحة لقيت الموضوع مش سهل لان اوقات كتير ممكن نسامح بس في حاجات بتلاقيها معلمة جواك و مش قادر تسامح فيها ، و بتبقي عاملة زي الفيروس الرخم مابيتشالش بسهولة و كل فترة تلاقي رسالة طالعالك تفكرك بيه بس لانك عايز تتخلص منه بتدور علي حاجة اقوي منه علشان تنساه خالص ، فهل معني كده انك تستني حاجة من اللي مزعلك تضيع اللي عمله او تنسيك الزعل بينكم ؟ و للا انك تعاتبه و تطلع كل اللي جواك و تشوف رد فعله يمكن يعتذر و الموضوع يخلص ؟ ، و لان الاختيار الاول صعب ( انه يعمل حاجة تنسيك ) فممكن نروح لموضوع العتاب و هو انك تجيب اللي مزعلك و تقوله بصراحة انك زعلان منه و تبين له سبب زعلك بس بشكل حلو و بسيط و من غير انفعال ، لان اوقات كتر العتاب بيزهق و بيخنق اللي قدامك ، و علي فكرة الطريقة دي بتنفع كتير اوي و عن تجربة ، بس افرض بقي انه بعد العتاب ماعتذرش ، ساعتها يا اما هو مايستحقش انك تعرفه اصلا او انك ممكن تكون غلطان او فاهم الموضوع غلط و انت اللي هاتفهم ده من كلامه ليك ،و من الاخر احسن طريقة نتعلم اننا نسامح بيها هو اننا نتعلم من النبي ( صلي الله عليه و سلم ) ، لانه كان بيقابل مصاعب كتير و مع ذلك كان بيسامح لسبب واحد و هو انه عايش لهدف واحد و هو ( ربنا ) و اي حاجة جنب الهدف ده ممكن تهون ، فحاول انك ماتخليش حاجة تعطلك عن الهدف ده ، و افتكر ان ربنا انعم عليك و اعطالك فوق ما تستحق و انت مع كل ده بتخون النعمة دي ، و مش بس اتلهيت بالنعم عن المنعم ده انت بتغضبه بيها و مع ذلك بيسامحك ، و انت ياللي اسمك ( عبد ) مش قادر تسامح ؟!!! .

جاهزة من مجاميعو

كنت قاعد بفتكر ايام ما كانت العرايس كتير قدامي و لما كنت لسة مش جاهز للجواز ، فأفتكرت يوم ما رجعت من الشغل و لقيت امي بتقوللي جايبالك عروسة مالهاش حل ، فاستغربت من الكلام خصوصا و انها عارفة ان مرتبي لسة مش كبير حتي بعد ما اترقيت ، فقلتلها ازاي ؟ ، قالتلي : بنت زي العسل و مؤهل عالي و عندها شقة و شبكتها عندها و مش بس كده ابوها شغال في بنك و مستعد يشغل جوز بنته معاه في البنك ، فمفهمتش امال انا هاتجوز بإيه ؟ بالمجهود ؟ ، و ليقت الموضوع صعب اني استوعبه و حسيت انه فيلم خيالي او حلم جميل و عارف اني هاصحي منه ، و قلت في نفسي : هو الراجل بيعمل كده ليه ؟ و هو كده مش بيرخص بنته ؟ و كده مش الشباب هايطمعو فيها ؟ ، بس لما قعدت افكر في الموضوع بهدوء و بدأت استوعبه لقيت المضوع بجد ممكن يكون صح ، و ان الراجل عايز يساعد بنته بأي طريقة و بأي تمن لدرجة انه مش عايز اكتر من شاب يحافظ علي بنته و بس ، و انا عارف ان في ناس هاتسأل : طيب ليه مارحتش تتقدملها طالما مقتنع بالكلام ، بصراحة السبب الوحيد اللي خلاني ماتقدمش لها هو موضوع الشغل ، ان البنت مستواها يعتبر عالي و لازم تعيش علي الاقل في نفس المستوي ، و في نفس الوقت ماقدرش اشتغل في بنك بسبب الشبهات الحرام اللي فيه ، و في حاجة كمان و دماغي بتروحلها كتير و هي اني كده هاعيش في املاكها و فلوسها ، فلو حصلت مشكلة بيننا هاعمل ايه و ساعتها لما تغضب هاتروح لاهلها و للا هاتقوللي روح لاهلك ههههههه ، و الراجل ممكن يعايرني بالموضوع ده و للا لا ، بلاش الراجل و خلينا في مراته اللي هي حماتي ، لو زعلت بنتها و هي طبعا حاسة انها صاحبة فضل كبير عليا و اللي انا مش هانكره بس مش هاستحمل انها تعايرني بيه ، و بصراحة عارف ان في تناقض في كلامي بس هو ده اللي كان في دماغي و احترت ما بين ( ان الشاب يختصر الامور و ياخد بنت جاهزة و يستحمل المشاكل المترتبة علي كده و يتقبل الوحش زي ما يتقبل الحلو ، او يصر انه يعتمد علي نفسه بس ساعتها ممكن يتجوز و هو بياخد مكافأة نهاية الخدمة ) .

عايز اتجوز

بجد الموضوع بقي صعب اوي ، و بدأت الاحظ حاجة غريبة و هي ان الواحد لما يعوز حاجة مايلاقيهاش او يبقي صعب يلاقيها ، و لما تكون مش عايزها تلاقيها كتير اوي قدامك ، يعني مثلا كان قدامي بنات كتير للجواز بس كنت ما بين اني لسة مش جاهز و امكنياتي ماتسمحش و اني كنت عايز مواصفات معينة بس بصراحة كنت انا اللي بتنك عليهم لاني اصلا مش جاهز و الموضوع كانت نتيجته واحدة ، المشكلة اني كنت بتكلم في موضوع قبل كده اسمه ( شاب مفلس ، بنات بتعنس ) و كنت بشتكي من الاهالي اللي بيغالو في المهور و الطلبات ، بس انا لسة ماوصلتش للمرحلة دي اساسا يعني لسة مارحتش للعروسة اللي اهلها عملو معايا كده و ده لاني مش لاقي بنت اصلا بعد ما كنت بقول انهم كتير ، و كأن البنات فجأة انقرضو او امريكا ضربت قنبلة لإزالة البنات اللي عايزين يتجوزو ، و بقيت لما بمشي في الشارع و بلاحظ بنات كتييييير و منهم اللي شكلها محترمة و منهم اللي مش محترمة بس برضو يبقي السؤال هما فين و الموضوع بالنسبة ليا مش زي ما شباب كتير بيقولو انه استقرار ، لاني اصلا ماعرفتش بنات او مثلا بضيع فلوسي علي الهلس ، الموضوع كله اني بروح الشغل و ارجع من الشغل ، فالموضوع مش هايبقي مجرد استقرار و بس ، الموضوع بالنسبةليا اكبر من كده يعني في نيتي اكيد اقامة بيت مسلم و انه يكون سبب للعفة و اعانة علي غض البصر و غيروووو بس برضو في حاجة كمان و هي اني بشر و اكيد صفات البشر بتختلف بين الراجل و الست ، علشان كده ممكن يكون جوايا حاجات ماينفعش تطلع لراجل زيي ، بمعني ان اكيد طريقة حبي لصاحبي مش زي حبي لواحدة ( اقصد مراتي ) اكيد في فرق في المشاعر و لاني جربت اني احب واحد صاحبي في الله ، فبقي لسة جوايا حب من نوع تاني عايز اطلعه ( لمراتي ) ، و علشان ماحدش يفهم غلط و يفتكر اني بتكلم عن موضوع شهواني و بس ، الموضوع اكبر من كده بكتير لاننا ببساطة مش حيوانات و اننا عندنا حاجة اسمها احاسيس و مشاعير ، و يمكن الموضوع زايد عندي شويتين لاني زي ما قلت ماعرفتش بنات ، فالموضوع بقي شبيه بالكبت و نفسي انه يتحقق النهاردة قبل بكرة ، علشان كده و في آخر الموضوع احب اقول :
( تعاطفك لواحده مش كفاية ، اتبرع و لو بعروسة ) .