فرق التعليم

و انا قاعد مع ابويا و بندردش شوية مع بعض لقيته جاب سيرة واحد صاحبه ، و عرفت منه ان الراجل ده مش متعلم ، و لأني عارف الراجل ده بشكل عام فكنت عارف انه متجوز دكتورة صيدلانية ، و بصراحة كانت مفاجأة انه يبقي مش متعلم ، فمفهمتش هو فعلا ممكن دكتورة تتجوز واحد مش متعلم ؟ ، و ايه هو الفرق في التعليم اللي يبقي مقبول بين الزوجين ، المهم اني بعد الموضوع ده بكام يوم لقيت واحد قريبي بيقوللي ان في ناس جايبين له عروسة و انها عاجباه كمواصفات ، فقالهم يقولولها ان في عريس جاي يشوفها ، فالناس ردت عليه رد غريب ، و هو ان العروسة عندها شرط ان جوزها لازم يبقي دكتور ، فقال لهم يعني مسألتكوش علي الاخلاق او السن او حتي المرتب و سابت ده كله و عايزة دكتور و خلاص ، بصراحة برضو مافهمتش وجهة نظر الآنسة المبجلة دي ، فتوقعت مثلا انها عندها مرض مزمن و عايزة توفر مصاريف الدكاترة ، او يبقي اكيد عايزة تتفشخر بيه قدام الناس و تقعد تقول في الرايحة و الجاية ( ختشيبي دكتشور ) ، و لقيت فرق شاسع بين الفكرين مابين واحدة مش مهتمة بالتعليم خالص و واحدة عايزة دكتور و بس ، طيب انا كشاب الاحسن ليا ايه ؟ ، آخد واحدة في نفس مستوي التعليم و للا ممكن اقل و للا ممكن تبقي اعلي مني ؟ ، و لقيت انه صعب انها تبقي اعلي مني لاني ساعتها هاحس انها بتتنطط عليا ، طيب لو هي اقل مني يبقي الفرق لحد فين ؟ ، و هل ممكن توصل انها تبقي مش متعلمة خالص ؟ ، للاسف مش لاقي رد علي الاسئلة دي ، و هايبقو جنب اخواتهم اللي مش عارف لهم اجابة .

كلمة و نص ...(2)

الموضوع ده فيه كلام لعلماء ، او كلام لحكماء ، او كلام لنفسي فهمته منهم :

1- ان المرأة اذا ضعُفَت و لانت غلبت الرجل الحازم و اذا قويت كُسِرت ، و اللِّين هو من صفات المرأة الصالحة الذكية .
2- تقبَّل علانية الناس و لا تحكم علي القلوب .
3- اعلم ان الله قد يبتليك بما تفهمه و لا تفهمه ( إلا بعد تدبُّر ) فكن حذر مع ما يعطيك ربك .
4- لا تقرب الفتن حتي لا تقع في شركها .
5- من دلائل تقبُّل التوبة فتح الله ابواب خير لك ( خاصة الجديدة ) و غلق ابواب الشر .
6- من فضل الله علي الشاب اذا نسك ان تتلقفه يد شيخ من اهل السنة تدله علي الصواب في الطريق .
7- الشيطان ساعدك كثيرا في الضلال فلا تتوقع منه ان يتركك عند الهداية بسهولة.
8- من ادام الطرق علي الباب فُتِح له .
9- جُبِلت القلوب علي حب من احسن اليها ، فإذا علمت ان من احسن اليك انما هو مُسَخَّر من الله فيكون حبك له ( لله ) .
10- الطريق الي الله يحتاج الي دليل و صاحب ، اما الدليل فهو شيخك و اما الصاحب هو اي شخص يعينك ، و ان كانت الزوجة فهو الخير .
11- لا يعطي اللهُ العبدَ لأن العبد يستحق و انما يعطي لأنه ( سبحانه و تعالي ) كريم.
12- مِن طُرُق غضِّ البصر حفظ الخواطر و عدم الاسترسال معها ، و اعلم ان الخاطر الضعيف يمر ببالك فيسقيه الشيطان حتي يكبر فيصبح عمل ، فاستعن بالله و احفظ خاطرك .
13- اتخاذ القرار هو اول خطوة علي الطريق .

انصحني شكرًا

بتحصل مواقف للواحد بيحتاج فيها لنصيحة من ناس قريبة منه و يكون واثق فيهم و علي الاقل عندهم خبرة بالمواقف اللي زي دي ، و ده مش معناه ان اللي محتاج النصيحة ضعيف او مش قادر ياخد قرار بنفسه لأن الموقف بيبقي له ضغوط ممكن تخليه مايشوفش حاجات غير شايفها ، و بيبقي عامل زي لعيب الكورة مهما كانت خبرته و مهارته دايما بيحتاج لمدرب شايف الموضوع من بره و كاشف الملعب كله ، بس المشكلة لما تحتاج نصيحة من حد و ماتلاقيهوش و حتي لو علي سبيل الفضفضة ، و اوقات بتبقي مش محتاج للي ينصحك لما تطلب النصيحة لانك ممكن تحتاج واحد ينصحك من نفسه و من غير ما تطلب علي الاقل تحس انك مش عايش لواحدك و ان في حد مهتم بيك و يمكن ساعتها ماتخدش النصيحة اللي انت عايزها منه بس كفاية انك تحس بوجوده و انه واقف جنبك و ده لواحده ممكن يخليك تاخد قرارك و انت واثق في نفسك ، المشكلة الاكبر بقي لما تلاقي واحد مش متقبل النصيحة اصلا و ده ممكن يكون له اسباب كتييييير ، منها انه يكون متكبر و فاكر انه لما ياخد برأي حد و يعمل بنصيحته ان ده بيقلل من شخصيته ، او انه يكون مغرور لأنه فاكر انه يقدر ياخد قرار في اي حاجة بنفسه من غير ما يرجع لحد او يستشير غيره ، او انه عنيد فبيبقي عارف ان رأي غيره صح و مابيخدش بيه لمجرد العند ، و دي كلها ممكن توصل لمرحلة المرض او عيب في الشخصية ، بس الاغرب من كل ده لما تنصح حد و تلاقيه مقتنع باللي جواه و مش عايز يعرف غيره حتي لو غلط ، و الاغرب من ده نفسه انه مايخدش بالنصيحه لأنه شايف ناس كتير بتعمل زيه و هو خد علي انه يمشي وراهم و خلاص ( يعني مثلا كنت راكب تاكسي و بنتكلم عن مسجد معين ، فقلتله اني مابصليش فيه لان فيه قبر و لسه هاوضح كلامي لقيته بيقول : يعني هما كل اللي بيصلو فيه بهايم و انتو اللي فاهمين ، بصراحة اتحرجت و ماقدرتش اكمل كلام ) ده للاسف لأنه شايف ناس كتير بتعمل كده فمش مصدق انه يبقي صح لواحده وسط ناس كتير غلط و نصيحتي للي زي ده و زي ما قال السلف (عليك بطريق الحق و لا تستوحش لقلة السالكين ، و اياك و طريق الباطل و لا تغتر بكثرة الهالكين ) .

و انت لواحدك بتفكر في ايه ؟

كنت قاعد اقلب في التليفزيون لقيت شاب بيتكلم علي قناة اسمها الرحمة تحس انك تعرفه من زمان مع انك اول مرة تشوفه ، كان اسمه الشيخ / احمد جلال فقلت اشوف بيقول ايه ؟ ، فلقيته بيقول : لما بتبقي لواحدك بتفكر في ايه ؟ ، و لقيته بيقول ان في ناس لما بتبقي لواحدها بتقرب من ربنا و في ناس لما بتبقي لواحدها بتبعد عن ربنا ، لفتت نظري الجملة دي ، هو صحيح الشاب لما بيبقي لواحده بيفكر في ايه ؟ يا تري بيفكر في البنت اللي عايز يوقعها ؟ وللا في الخروجة الزفت اللي عايز يخرجها مع اصحابه ؟ . و البنت لما بتبقي لواحدها بتفكر في ايه ؟ يا تري بتفكر في صاحبها اللي بيشتغلها ( و اللي بيرسم عليها الدور علشان تتعلق بيه اكتر ، خصوصا و ان مافيش حاجة اسمها صحوبية بين الولد والبنت ) ، وللا في صاحبتها اللي دايرة علي حل شعرها و نفسها تعمل زيها ؟ طيب تعالو نوسعها شوية و نجرب نروح الاستاد يا تري الناس اللي قاعدة دي كلها بيفكرو في ايه ؟ ، و لقيت فعلا اني لما احب اعرف انا عايز ايه من الدنيا و عايش ليه لازم اعرف الاول انا بفكر في ايه خصوصا لما ببقي لواحدي ، علشان كده خد بالك من افكارك ، ( و خليك فاكر ان زي ما اول خطوة علي الطريق هي القرار ، الفكرة هي اول خطوة للقرار ) ، يعني لو كانت افكارك سودة هاتبقي قراراتك اسود منها ، و يمكن دي اللي الناس بيسموها الخواطر او احلام اليقظة ، و دي تعرفها لما تلاقي نفسك قاعد تقلب في دماغك حاجات مابتحصلش قي الحقيقة اصلا و عاملة زي الافلام الخيالية ، مثلا تلاقيك بتفكر انك انقذت ملكة جمال العالم و عشتو قصة حب ( مع انك متأكد انها استحاله تبصلك و لو بصتلك يبقي علشان تحمد ربنا علي النعمة اللي هي فيها ) ، و البنت اللي بتفكر ان احمد السقا جاي يتقدملها و هي بتقف قدام اهلها علشان تتجوزه ( مع انه لو شافها هايطبق قرشين و يديهملها ) ، و عشلان مانتعبش نفسنا ياريت مانسبش نفسنا لاحلامنا و افكارنا علشان يوم ما نفتح عنينا من الحلم ده و نلاقي الواقع نرضي بيه و مانكرهوش ، و نصيحتي في ثلاث كلمات :
( فكر ، خد قرارك ، ابدأ طريقك ) .

عليك البداية و عليه التمام

( عليك البداية و عليه التمام ) جملة كنت بسمعها كتير بس زيها زي كلام كتير ممكن نسمعه او نقراه حتي لو قرآن او حديث و ماناخدش بالنا منه غير في مواقف معينة ، و ده حصللي لما كنت قاعد حوالي الساعة 12 (نص الليل) و قلت اجيب كتاب اقراه ( لان من زمان أوي ماقرأتش كتاب يقربني من ربنا خصوصا مع احساس البعد عنه) و كان الكتاب اسمه تهذيب مدارج السالكين للامام ابن القيم ، و قلت ابدأ بيه علشان اقرب من ربنا تاني ، و فجأة لقيت تليفون من واحد صاحبي لقيته بيقوللي ان في واحد مات و انهم هايصللو عليه في خلال لحظات ، قفلت الكتاب مع اني ماقرأتش غير المقدمة بس و نزلت بسرعة ، اتفاجئت بناس كتييييير اوي واقفين بره الجامع مع ان الوقت متأخر خصوصا اننا في الشتاء و الجو برد جدا ، قلت ادخل الجامع علشان البرد فلقيت عدد اكتر بكتييييير من اللي بره ، صليت تحية المسجد و استنيت ، و سمعت ان اللي مات كان لسه شاب عمره مايتعداش 23 سنة و الاصعب من ده هي طريقة موته و هي ان اهله دخلو يصحوه لقوه ميت من غير مقدمات ، حطيت راسي علي ايدي و حسيت اني عايز اعيط و لقيت شيخ بدأ يتكلم لغاية المتوفي ما يوصل و ماسمعتش منه غير كلمة واحدة رنت في وداني و هي ( مش ناوي تتوب ) و كأن الكلمة موجهة ليا و ان فعلا الشاب اللي مات ده كان ممكن يكون انا ، بس يا تري لما اموت في كام واحد ربنا هايخليهم يصلو عليا ؟ و كام واحد هايدعيلي ؟ و كام واحد هايزعل عليا ؟ و كام واحد هايفرح لموتي ؟ ، بس السؤال اللي المفروض ييجي قبل كل الاسئلة دي ( ربنا هايكون راضي عني ؟ هايسمحني ؟ هايغفرلي كل اللي عملته ؟ ) سؤال صعب و اجابته اصعب ، ياااااااه صحيح الدنيا دي ماتستاهلش اني اغضب ربنا ، لان بسهولة ممكن مع احلامي و طموحاتي و انغماسي في الدنيا و قلبي اللي بيموت يوم ورا يوم ممكن اغمض عيني ماعرفش افتحها تاني ، و فضلت الكلمة في وداني ( مش ناوي تتوب ) و ساعتها افتكرت كلام ربنا ( ألم يأن للذين ءامنوا أن تخشع قلوبهم لذكر الله ) يااااااه كأن ربنا بيخاطبني انا و بيدعوني لرقة قلبي بعد ما مات ( معقولة ربنا يعرض عليا التوبة و رقة القلب و انا ارفض؟!!! ، بلي يا ربي قد آن ) ، و ساعتها فهمت معني ( عليك البداية و عليه التمام ) و هو اني كنت لازم ابدأ و تكون البداية مني بعد قرار التوبة فلما قرأت كتاب ( اي عمل صالح ) ربنا ارسل ليا مكالمة الموت اللي قربتني اكتر و اكتر من ربنا ( و ده كله لأن ربنا كريييييم ) .

لابسة من غير هدوم

و انا راكب العربية مع واحد صاحبي لقيته سألني سؤال غريب ، لقيته بيقول : هي البنات دي لابسة كده ليه ؟ ، و المشكلة اللي اغرب من السؤال نفسه هي الطريقة اللي كان بيتكلم بيها ، لأني لقيته بيتنهد تنهيدة كبييييرة اوي و تحس بالقهرة في كلامه و الحسرة علي الزمن اللي احنا فيه خصوصا لما تعرفو انه متجوز ، امال انا اعمل ايييييه ؟ ، طيب نرجع للسؤال الاهم : هما لابسين كده ليه ؟ ، يا تري علشان يتجوزو ؟ ، ماظنش لان مين قال انهم علشان يتجوزو يقلعو ( او يلبسو من غير هدوم ) ، و حتي لو اتجوزو هايتجوزو مين ؟ ماهو هايبقي اكيد شكلهم ، و بصراحة بقي انا مش عارف مين الراجل اللي يقبل يتجوز واحده كده ، و ازاي البنات دي خرجت من بيت فيه راجل اساسا ، و الاغرب اننا بقينا نشوف البنت اللي عايزة تبقي محترمة و تلبس حجاب ( بس بطريقتها ) تلاقيها مغطية شعرها و كاشفة جسمها او لابسة بنطلون مدخلاه في جسمها بصابونة ، و كأن هو ده الحجاب الشرعي ، و بقو فاكرين ان تغطية الشعر هو الحجاب و مش عارفين مثلا انه لازم يكون فضفاض و مابيشفِّش و مش ملفت ، و بصراحة ببقي محتار اوي لما بفكر هي ازاي دخلت البنطلون ده فيها او ايه نوع الصابون اللي بتستعمله و بتصعب عليا و هي ماشية ياعيني هاتنفجر من اللبس الضيق ، ماعلينا ، لو الموضوع موضوع جواز ماهو في بنات حوالينا و كل الناس عارفة بنات حواليهم ماطلعوش من بيوتهم اصلا و بيتجوزو ، و بنات بيلبسو لبس محترم جدا و محجبات ( بجد ) و برضو بيتجوزو ، يبقي فكرة اللبس علشان الجواز مرفوضة ، يبقي بيعملو كده ليه ؟ ، يمكن البنت عايزة تغري الولاد ، بس لما تغريهم هي هاتستفيد ايه ؟ ( هي ماعندهاش اخوات ولاد ، حرام عليها اللي هي بتعملو فينا ) ، المشكلة اللي هما مش عارفينها ان معظم الشباب او الرجالة ( اللي بجد ) لما بيشوفو واحدة كده بيبقي كل تفكيرهم انهم يعرفو واحدة جميلة يقضو معاها يومين مش انهم يتجوزوها ، و علي فكرة انا مابتكلمش عن البنات اللي بالي بالك ، انا بتكلم عن البنات اللي المفروض انهم خارجين من بيوت بيقولو عليها انها محترمة ، للاسف مش لاقي رد للسؤال ، و نداء الي اصحاب القلوب الرحيمة : ياريت البنات يرحمونا شوية ، مش هايبقي مافيش شغل ، و مرتبات قليلة ، و اهالي بتتنك علي الشباب اللي عايزين يتجوزو ، و يلاقو البنات دي قدامهم كمان ، و بيقولو مش عارفين البلد فيها تحرش ليه ، دي خيبة ايه دي .