جزيرة و جزاير(كورة تودينا و كورة تجيبنا)

شاهد الموضوع علي اليوم السابع
احساس غريب كلنا حسينا بيه في مصر بعد ماتش مصر و الجزاير اللي كان في السودان ، و هو اننا موجودين علي جزيرة معزولة عن الناس في بقيت العالم ، و الاحساس ده جالنا بعد الاحداث الشهيرة في السودان بعد الماتش و لما لقينا نفسنا بننفخ في إربة مقطوعة و ان مافيش حد سامعنا و لا مهتم بينا و لا باللي حصلنا ، و الاكتر من ده لما لقينا العالم كله بما فيهم العرب واخدين موقف مننا و كأننا احنا اللي عملنا شغب او اتعدينا عليهم ، و ماعدَّاش غير كام يوم و لقينا الكابوس اللي كنا خايفين منه و بنحاول نبعد عنه لقيناه بيتحقق فعلا و هو ان مصر تقابل الجزاير تاني خصوصا في الوقت ده ، و المرة دي كانت مختلفة شوية لاني حسيت اننا شبه استعدينا للموضوع و بالذات في الاعلام الرياضي و كان باين اوي ان معظم الاعلاميين كانو بيتكلمو بحذر و بحرص ، يمكن شوية منهم كانو خايفين اننا نتغلب لان ساعتها مش هايبقي لنا عين نتلكم معاهم تاني ، و الشوية التانيين ماكانوش عايزين يعملو شحن للجمهور زي المرة اللي فاتت ، و بدأ الكابوس قصدي الماتش و الناس عايزة تصحي من الكابوس بسرعة و عدت الساعة و نص و عدي معاها الكابوس اللي الكل كان خايفين منه و اتحول الكابوس لحلم جميل بيتحقق للناس ، و بعد ما كنا عايشين علي جزيرة مهجورة الناس مش مهتمة بيها بقينا عايشين علي جزيرة كل الناس معجبة بيها و بتتفرج عليها و علي السعادة اللي الناس فيها بالرغم من الهموم و المشاكل اللي فيها ، و بقي كل العالم مالوش سيرة غير مصر و اللي عملته في الجزاير ، و للاسف بقي ماتش ممكن يخلينا عايشين في جزيرة مهجورة و ماتش يخلينا نعلِّم الجزاير انهم يحترمونا ، و معداش كام يوم من تاني الا و مصر بتفرح شعبها و العرب كلهم و بتحسر بعض الناس اللي كانو نفسهم اننا نتهزم و بقت وكالات الاعلام الدولية كلها مالهاش سيرة غير مصر و انجازاتها ، بس للاسف بتخيل لو كان حصل العكس و اتغلبنا كان ايه اللي ممكن يحصل من اخواتنا قبل الغرب .
هو ده حالنا ( كورة تودينا و كورة تجيبنا ) .

ولاد نـاس

في كلام كتير بنقوله و ممكن مانبقاش عارفين معناه ، و كتير اوي بنقول كلمة ولاد ناس و ابن ناس و بنت ناس ، بس مين هما ولاد الناس ؟ ، مثلا تلاقي واحد يقول فلان ده ابن ناس بس ساعتها بيبقي قصده انه من عيلة غنية ( فبقي اللي معاه فلوس ابن ناس ) ، و تلاقي واحد تاني يقول علي حد عيلته مشهورة شوية انه ابن ناس و مابيبقاش مهم ساعتها هي العيلة مشهورة بإيه المهم ان سيرتها علي كل لسان ( فبقي اللي عيلته مشهورة ابن ناس ) ، و في ناس بتنخدع بالمظاهر فيلاقو واحد لابس لبس غالي او حتي مش شرط غالي بس مطقم وشيك شويتين و ياسلام لو لابس نظارة شيك كمان فتلاقيهم يقولو عليه ابن ناس ( فبقي الواد الشيك ابن ناس ) ، و في ناس بتهتم اوي بالمناصب او الشهادة التعليمية فتلاقيهم معجبين اوي بالدكتور او المهندس او مدير الحسابات ( زيي ههههه) و غيره ( فبقي اللي معاه شهادة ابن ناس ) ، و في نوع من الناس بيبقو معجبين اوي بالواد المسمسم اللي تقاطيعه مسمسمة و يقولو عليه ابن ناس ( فبقي اللي شكله حلو ابن ناس ) ، و في ناس بيعجبو باللي حافظله كلمتين انجلش ( يعني فرنساوي ) و طول ماهو قاعد معاهم بيبرطم بالكلمتين اللي هو مش حافظ غيرهم و تلاقيه مش عارف معناهم و بيستغل جهلهم بالكلمتين دول بقو بيقولو عليه ابن ناس ( فبقي اللي بيبرطم ابن ناس ) . ممكن يكون في حاجات تانية انا مش فاكرها او مش عارفها اصلا لانها ماعدتش عليا قبل كده ، بس اللي لفت نظري ان عمري مثلا ما سمعت عن اللي اخلاقه عالية يبقي ابن ناس ، او البنت اللي عندها حياء و متربية كويس انها بنت ناس ، و الغريبة انك تلاقي شباب بيعاكسو بنت و البنت دي عاملة في نفسها البدع علشان تتعاكس فتقوم بصه لهم و تقوللهم : هما بنات الناس يتعمل فيهم كده ، بنت ناس ايه يا بنت التييييييييييييت .

احسبها قبل ما تتنازل

اتعودنا من زمان اننا نقدم تنازلات ، بس يا تري ممكن نتنازل عن ايه ؟ و لحد فين ؟ ، يعني مثلا واحنا عيال صغيرين كنا مش كل اللي بنطلبه بيجيلنا ففي عيال ذكية شويتين فلما كان يعوز يجيب لعبة متوسطة كان يطلب من ابوه لعبة كبيرة اوي علشان لما تجيله اللعبة المتوسطة يبقي مبسوط و من هنا بيبدأ يكون جواه ثقافة التنازلات ، و تلاقي البنت اللي سنها صغير و عرسانها كتير تلاقيها بتتنك علي خلق الله و تقدم شروطها لفتي احلامها و اللي بتعجز بيها الشباب بس اول ما بتكبر و قطر الجواز بيفوتها بتبدأ تتنازل و ممكن تاخد واحد مناخيره ست فتحات ، و الست اللي ماحدش كان يقدر يغلبها بالكلام و معروفة ان دماغها ناشفة بقت ممكن تتنازل كتيييير علشان ترضي جوزها ، و الراجل اللي طول عمره معروف بالتقل بقي ممكن يتنازل ( مش كتيييير ) علشان يرضي مراته ، في انواع كتير من التنازلات لو قعدنا نعد فيها و في انواعها مش هانخلص ، السؤال هنا : ايه الحاجات اللي ممكن نتنازل فيها و نقول مافيش مانع ؟ ، و ايه الحاجات اللي ماينفعش فيها تنازلات ؟ . يعني مثلا البنت اللي بتحب شاب قبل الجواز ( و ده غلط طبعا ) ممكن تتنازل له عن ايه ؟ يعني ممكن ترضيه علي حساب ابوها و امها ؟ و للا ممكن ترضيه بانها تتنازل عن مبدأ من مبادئها ؟ و هل ممكن تحكيله علي اسرارها ؟ و في الاخر ممكن تتنازل له عن نفسها ؟ . و البنت اللي عايزة تتجوز و فاكرة انها لما تلبس من غير هدوم او تعمل في نفسها حاجات هي مقتنعة انها غلط هاتتنازل مقابل الجواز ؟ . و البنت اللي فاكرة انها لو سابت الواد اللي هي ماشية معاه ( و ده غلط ) انها مش هاتعرف تعيش من بعده و مش متخيله زوج غيره ، لو الولد طلب منها حاجات تتنازل و تنفذله طلباته ؟ . و الست اللي عايزة ترضي جوزها ممكن تتنازله عن ايه ؟ يعني مثلا لو قاللها تقلع الحجاب تقلعه ؟ او انها تعامل اصحابه الرجاله كويس ( اصله مش راجل ) هاتتنازل و تعمل كده ؟ . طيب الشاب اللي بيدور علي شغل و قدامه الشغل الحرام بمرتب كبير و مغري جدا يتنازل و يروح ؟ و لو كان شغل حلال بس من شروطه انه يتنازل عن بعض مبادئه يتنازل و يقبل ؟ . علشان نعرف نرد علي الاسئلة دي ببساطة لازم نعرف احنا هانكسب او هانخسر ايه من ورا التنازلات دي ، بس الاهم هو اننا نعرف يا تري التنازلات دي هاترضي ربنا و للا لأ ؟ .

يكفيني ذكراها

يكفيني ذكراها

فحين اذكرها في مخيلتي اري قوام عجيب يكاد يخطف ناظري

اراني اذوب معها كما تذوب هي معي

فهي تصبح طواعية لي و لا اراها تقاوم ملذاتي

فكلما شعرت بفراغ داخلي لا اري سواها

لا اري الا تقسيمات بها يسيل لها لعاب من به احساس

سمراء هي كلون الخيل الاصيل

ففي لونها الداكن يكمن السر فلا تحتاج الي ما يضيف لجمالها

و اخال بشعوري حين تلمسها يدي و كأني بنجم مهتاج بين يدي

و اكاد اغيب حين تتلامس شفتاي مع قوامها الخلاب

الذي اري في اصله رقة تناظر حرارتي

فما لنوعمتها و رقتها مع حرارة هي النار في اصلها

و ما لصلابتها مع نعومة مظهرها في برد قارس و كأني في اصل الشتاء

علمتني العشق بعد ما كنت لا اعلم منه سوي الحروف

سقتني الهوي بعد ما كنت لا اعلم منه سوي الهوان

ارشدتني بأن المال معها لا يساوي شيئا

و لا اعلم بماذا اشعر عندما اري كثير يعشقونها و يسيلون المال من اجلها

فهل احزن انها ليست ملكي بمفردي

ام تغمرني السعادة حيث انها مرغوبة من عشاق لها و انا المسها بشغف و شوق

فيا من تعلمون طريقا لها

و يا من تعلمون مكانها

يا ريت تقولولي الاقيها في اي سوبر ماركت و نازل عليها عرض وللا لأ

(طبعا انا كل ده قصدي علي شيكولاته كادبوري ، امال انتو كنتو فاكرين ايه ؟).

ضحكة عن ضحكة تفرق

كنت زمان اعرف كام نوع من الضحكة ، مثلا لما حد يقول حاجة تضحك فبضحك عليها ، و لما تقابل حد بتحبه و بتحب انك تشوفه بتضحك في وشه ، بس بعد ما دخلت الجيش و قابلت اشكال و الوان عرفت انواع غريبة من الضحكة ، مثلا تلاقي واحد جاي و احنا بنشتغل و بنبني حاجة معينة يقوم هاددها برجليه و يقعد يضحك و ساعتها بتبقي بتتمني ان صاروخ ينزل عليه من غير ما ينفجر بس يادوب ينزل في بقه و يسد الضحكة دي ، و واحد تاني يطلب منك شغل استحاله بشر يقدر يعمله و برضو تلاقيه بيضحك في وشك و علي رأي واحد صاحبي كان يقول : ( اهو فشخ ضبه زي حصان المرجيحة ) ، وتلاقي واحد تالت يضرب فيك اسفين مالوش حل و بتبقي عارف انه عارف انك عارف ان هو اللي ضرب الاسفين ده و برضو تلاقيه بيضحك في وشك و ساعتها بتتمني ان زلزال يخلي الارض تنشق و تبلعه لواحده هو بس ، و طبعا الضحكة اللي لاقيتها مشهورة اوي هي الضحكة الصفراء و هي ان واحد يضحك في وشك و هو مش طايقك او يبقي عايز مصلحة منك ، سبحان الله حتي الضحكة الدين ما سبهاش لما النبي عليه الصلاة و السلام علمنا ان التبسم في وجه اخيك صدقة ، و في ضحكة حبيت اسيبها للاخر لان ممكن يكون فيها كل الانواع اللي فاتت و هي لما تضحك الست في وش جوزها او الراجل في وش مراته ، تلاقي الست لما تحب تطلب حاجة من جوزها و جوزها بيهزر هزار يلطش تلاقيها ( فشخت ضبها ) و كانها قاعدة قدام عادل امام ، المشكلة بقي لو الراجل متجوز واحدة ما بتضحكش خالص ، و دي نصيحتي ليها انها تخيط شفايفها في مناخيرها و دقنها ، و من الجنب في ودانها يمكن يجيب نتيجة و لو ماجابش نتيجة نعتبره نيولوك و لو ماعجبش يبقي تطلق و بلاش تقرفنا .

الجدار مش حصار

الكلام كتر اوي علي الجدار اللي بيسموه الجدار الفولاذي و بقت كل الناس بتتكلم في كل حاجة و في كل حته ، طيب اشمعنا انا ، يمكن اللي لفت نظري للموضوع ان الناس اللي معترضة و كالعادة هي اللي صوتها عالي اوي و بيقولو كلام جامد و معظمه بيوجع ، و الناس اللي خدو القرار صوتهم واطي و بينفذو القرار بهدوء ، و بصراحة انا مقتنع بالقرار ده ، و ده يمكن لاني فكرت بطريقة عادية اوي ، فتخيلت ان واحد عنده بيت و البيت ده حواليه سور و السور له ابواب ، و الواحد ده كل ما يلاقي جيرانه عايزين حاجة ما بيبخلش عليهم بالحاجة دي و لو الحاجة دي مش عنده في البيت ممكن يجيبها من بره ، و يقوم فاتح الابواب و يدي جيرانه الحاجة اللي عايزينها ، بس و هو بيعدي علي السور بيلاقي فيه كام فتحة ، قعد يطنش في الاول بس مرة في مرة اكتشف ان في ناس بتستغل الفتحات دي علشان يدو حاجات لولاده يضروهم بيها ، فقرر انه يقفل الفتحات دي و يفضل برضو يساعد جيرانه عن طريق الابواب ، الناس لما شافته بيقفل الفتحات دي افتكرو انه بكده هايقطع علاقته بجيرانه ، و الناس دي للاسف حاولت تمنعه انه يسد الفتحات حتي لو وصلت انهم يمنعوه بالدم و مافيش مانع انهم يقتلو ولاده كمان ، و راحو لشيوخ ( المفروض اننا بنحترمهم ) علشان يحللو اللي بيعملوه ، و لما بدأ يدافع عن نفسه طلعوه هو اللي غلطان و قعدو يشوهو صورته قدام الناس كلها ، هي دي فكرة الجدار ببساطة اللي احنا عايزين نعمله بيننا و بين اخواتنا في فلسطين علشان نقفل الانفاق اللي بتسبب لينا مشاكل ( زي المخدرات و الاسلحة اللي بتتهرب لينا من عندهم و غيرها ) و نفضل محافظين علي المعابر اللي عن طريقها بنقدر نبعتلهم المعونات اللي محتاجنها ، و للاسف كان رد الجميل لينا ان شبابنا اللي علي الحدود يتقتلو و بدل ما هما يساعدونا اننا نحافظ علي ولادنا بقو هما اللي بيضربوهم و يموتوهم ، بالله عليكو مش حاجة تكسف !!!.

بنت من البنات

و انا قاعد في مرة مع نفسي لقيت بنت من بنات افكاري جاية تقعد معايا ،
و بتقوللي : ايه يا عم مالك ؟ ، قلتلها : مش عيب عليكي تكوني من بنات افكاري و ما تكونيش عارفة بفكر في ايه ،قالتلي : اصلي لقيت اخواتي البنات قاعدين معاك قلت اسيبكو شوية ، و اول ما لقيتك لواحدك قلت اشوف مالك و ايه اللي محيرك ، قلتلها : مش عارف اذا كان اللي بعمله ده صح و للا غلط ، هو انا لما احافظ علي بنات الناس و احاول اداري مشاعري عنهم يبقي انا كده فيا حاجة غلط او ابقي معقد او زي ما في واحد قاللي اني خايف ، و ليه الناس مش فاهمة اني لما بشوف واحد ماسك ايد واحدة ببقي نفسي اعمل زيهم ، و لما بلاقي واحدة في عنيها سعادة كبيرة اوي و هي ماشية مع واحد صاحبها ( طبعا ده غلط ) ببقي نفسي اعمل كده ( بس مع مراتي ) ، و يمكن المشاعر اللي جوايا بحاول اني احافظ عليها ليها ، و فجأة لقيتها بتأسل سؤال غبي خلاني متبرجل : و هو انت ايه اللي ضمنك انك تاخد واحدة زيك و تكون انت اول حب ليها و انها تكون محافظة علي مشاعرها ليك انت بس ؟ ، و اوعي تكون مصدق نفسك انك بتحافظ عليهم ، انت بس تلاقيك مكسوف و عمال تضحك علي نفسك علشان تصبر نفسك ، قلتلها انا ماشي بمبدأ ( كما تدين تدان ) و زي ما انا ما بضحكش علي بنات الناس اكيد ربنا هيبعتلي اللي تحافظ عليا و ما تكونش بتضحك عليا ، قالتلي : ما يمكن ربنا يبتليك بواحدة يكفر بيها ذنوبك ، قلتلها : تصدقي انك غبية و رخمة اوي و يللا امشي من هنا ، لقيت اختها جاية ( بنت برضو من بنات افكاري ، اصل الحاجة افكاري دي عندها بنات كتير اوي ) و قالتلي : انا سمعت الموضوع كله و عايزة اقولك ماتصدقهاش ، و طالما انت مابتعملش حاجة تغضب ربنا يبقي انت ماشي صح ، و دايما خليك فاكر ( الطيبون للطيبات ) .

حكاية شريحة الموبايل

و انا راجع من صلاة العصر و ماشي في نفس الطريق بتاع كل يوم اتخايلت بحاجة برتقالي علي الارض فرجعت اشوفها ، لقيتها شريحة موبايل ، خدتها معايا البيت و حطيتها في موبايل من بتوعي ( اصل انا عندي اتنين ، غني بقي ) و قلت اشوف الارقام اللي عليها علشان ارجعها لصاحبها ، بس و انا بحط الشريحة في الموبايل دارت شوية افكار في دماغي خصوصا و اني في سن جواز : ( يا سلام لو طلعت بتاعت بنت ، يا سلام لو سنها يبقي مناسب ، يا سيدي لو طلعت متدينة زي ما انا عايز ) طبعا كلها احلام و كأنه فيلم عربي قديم ، حطيت الشريحة و دخلت علي الارقام اللي متسجله عليها لقيت معظمها بنات ( قلت شكلها هتلعب يا واد و هتطلع بنت ) ، جيت اشوف رقم اكلمه منها علشان يعرفني مين صاحب الشريحة مالقيتش فيها رصيد ، قلت مش مشكلة ابعت رسايل كلمني لشوية ارقام من اللي علي الشريحة ، و فعلا بعت بس ماحدش عبرني ، و انا بقلب في الارقام نقيت كام رقم و خليت امي هي اللي تكلمهم و للاسف ولا واحدة ردت ( مش عارف مقفلة ليه ) ، و الغريبة ان ابويا و امي عايشين في نفس الحلم الوردي ( و هو ان ربنا باعتلي الشريحة دي و معاها عروسة ) ، و لقينا رقم رد ، امي كلمت البنت اللي ردت و قدرنا من خلالها نكلم صاحبة الشريحة ( و فجأة الحلم بدأ يتحقق ) ، امي كلمت صاحبة الشريحة و في وسط الكلام عرفت انها لسة في الجامعة ( حلو اوي يبقي طلعت بنت و سنها مناسب ، لسه باقي انها تطلع متدينة و برضو شكلها يبقي مقبول ) ، فجأة لقيت امي بتسألها انتي لابسة نقاب ؟ ( اصل امي عارفة اني بحب المنتقبات ) فالبنت تقريبا قالت لها : آه و عرفتي ازاي ؟ ، امي قالت : من طريقة كلامك ( ايه ده الحلم هيبقي حقيقة وللا ايه ؟ ) ، و لقيت امي بتتفق معاها علي انها تقابلها في الشغل ( ايه ده شغل ايه ، طيب وهاتشوفها ازاي ، دا البنت منتقبة )،( يعني مش هانعرف شكلها و الموضوع هايبوظ ، لاااااااااااااااااا ) ، سيبت السردينة من ايدي ( اصلنا كنا بنتغدي صانية سردين مالهاش حل ) و قلت لامي كلميها دلوقتي حالا و قوليلها انكو تتقابلو بعد صلاة العشاء في اي جامع علشان تكون كاشفة وشها ، و فعلا نزلت تقابلها ، و انا رجعت من الصلاة و امي لسة مارجعتش و الافكار بتاكل في دماغي ، شوية و الجرس ضرب ( ماموووووووووو ) جريت افتح الباب لقيت امي راسمة 8 علي بقها فقلتلها مالك ؟ ، قالتلي : طلعت راجل مش بنت ( لا لا بهزر ) ، قالتلي : طلعت جميلة وكل حاجة بس اكبر منك ، فسألتها : انتي مش قلتي انها في الجامعة ؟ ، قالت : طلعت ساكنة في شارع الجامعة و انا اللي فهمت غلط ، قمت اكسر في البيت و ارمي في العفش و اقطع في اي حاجة قدامي ( لا طبعا انا قصدي كان نفسي اعمل كده بس طبعا ماعملتش ) . و الموضوع طلع فشنك . و ساعتها كنت حاسس اني كنت بتكلم مكالمة مهمة و لقيت فجأة واحدة بتقول : ( عفوا قد نفد رصيدكم ) . و في النهاية نصيحة مني للشباب اللي عايزين يتجوزو انهم يصلو كل الفروض في الجامع بس و هما ماشيين قي الطريق يبصو علي الارض كويس يمكن يتكعبلو في شريحة بتاعت بنت و للا حاجة ، اما بالنسبة للبنات فيجيبو شرايح موبايل كتييير و يرمو شوية في كل حتة يمكن يلاقو حد ينطس في نظره و يتجوزها ، و اهو بكده ابقي شاركت في حل ازمة العنوسة في البلد .

كلمة و نص ... (1)

الموضوع ده فيه كلام لعلماء ، او كلام لحكماء ، او كلام لنفسي فهمته منهم :
1- احبت فأرة جملا فجرته الي بيتها فتبعها حتي اذا اتت بيتها دخلت و هو وقف ، فقال لها : اما ان تتخذي بيتا يليق بمحبوبك او تتخذي محبوبا يليق ببيتك (فإن اردت حب الله فغير قلبك ليسع حب الله ).
2- كما ان العين لها حدود فلا تستطيع رؤية ما وراء الحائط ، فالعقل ايضا له حدود ، فما اقره القرآن و السنة لا نجادل فيه و نسلم به .
3- لو كانت ام سيدنا موسي فكرت في القاءه في اليم و عرضت الامر علي العقل لكان الاصل هو الرفض ، و لكنها سلمت لامر ربها دون التفكير فكان التمكين .
4- احذر ترك النصح و عدم قبوله .
5- اذا طلب منك احد نصيحة لاتغشه و لا تجمل له ( بل بين له ) .
6- لا تلزم احد بما تنصح فإنما عليك البلاغ و علي الله الهداية .
7- لا تعش علي مرادك من الله ، و لكن عش علي مراد الله منك .
8- القلب الحي لا ينشغل بالنعم عن المنعم ، او بالبلاء عن المبتلي .
9- اعلم ان الله قد يعطيك ليري مراده منك فاحذر ان تقل عن المراد .
10- ليس الله دوما يبتلي ليعذب بل يبتلي ليهذب و لكن ايضا هناك ابتلاء للعقوبة فاحذر منها .
11- لا تحسبن المجد تمرا انت آكله ... لن تبلغ المجد حتي تلعق الصبر .