الطيور علي اشكالها تقع

انا كنت ناوي ماتكلمش في الموضوع ده تاني ، بس و انا قاعد بتفرج علي التليفزيون لقيت برنامج علي الفضائية المصرية و كان المذيع هو جمال الشاعر و مستضيف معاه شوية نقاوة ، كان معاه وزير الاوقاف و شيخ الازهر و المفتي و الست سعاد صالح و احمد الطيب ونصر فريد واصل و الشيخ الراوي و طبعا كان الاستوديو مليان ناس من الازهر ، و لقيتهم بيتكلمو عن النقاب و انا اللي كنت فاكر ان الموضوع مات اتاريهم عايزين مش بس يموتو الموضوع دول عايزين يدفنوه كمان ، و لقيتهم بيثبتو ان النقاب فضل مش فرض ( طيب يا ريت هما يقتنعو بده و مايبقاش بس كلام ) ، و ليقت الشاعر بيسأل : هو البنت ليه تتنقب لو كانت وسط بنات و اللي بتدي المحاضرة واحدة ست ، فطبعا كلهم اتفقو علي الرأي ده ( و انا معاهم ) ، و لقيته سأل الشيخ الراوي : ايه المشكلة لو كان اللي بيدي المحاضرة واحد راجل ، فالشيخ الراوي و لانه محترم قال ببساطة : مفيش بلد بتتقدم من غير ما تحافظ علي الفضيلة و اكتفي بالكلام ده ، فالشاعر قال : طبعا احنا فاهمين ان الشيخ الراوي مع النقاب ، وبعدها كلهم سخنو و زقزوق اتكلم وقال : النقاب مش دليل علي الاحترام ( طيب ومين قال ان كل المنتقبات محترمين ، اكيد لكل قاعدة شواذ ، لو بالطريقة دي طيب ماهو مش كل المحجبات محترمين بس مش معني كده انهم يقلعو الحجاب ) ، وبعدها اتكلم عن ان النقاب مالهوش علاقة بالحرية الشخصية و ان في ناس لبسو النقاب و عملو بيه جرايم ( طيب هو لو شايف ان المنتقبة دي متطرفة و ماهياش حرة يبقي العريانة او اللي مش محجبة هي كمان متطرفة و لازم نمنعها تمارس حقوقها و بالنسبة للجرايم افرض ان واحد لبس ازهري و عمل جريمة هل نلغي الزي الازهري و افرض لبس ظابط هل نلغي لبس الظباط ، تفكير غريب اوي ) ، و شيخ الازهر لازم يتكلم فقال : هو اللي بيدي المحاضرة جاي علشان يبص علي البنات ؟ ( احب اقول له انه لو بص علي واحدة حلوة و ما تفتنش بيها يبقي مش راجل ) و شوية و قال : مفيش مانع اللي عايزة تلبس النقاب تلبسه بره الازهر ( يعني هو لو النقاب غلط تسمح لها ازاي تلبسه سواء بره او جوه الازهر ، ايه التناقض ده ) ، وطبعا المفتي ماتوصاش و قال ان النقاب ده نتيجة عقلية عفنة و تافهة ، و الست سعاد ولانها مش محتاجة عزومة حبت تشعللها و قالت : احنا خلينا الدين بحتة قماش و بقي الدين بالشكل و انا همنع اي منتقبة تدخل المحاضرة سواء المحاضر ست او راجل ( طبعا الست سعاد معروفة بآراءها الغريبة و المضحكة و نصيحة ليها تقعد في البيت وتراعي جوزها و ولادها احسن ) ، ( اما بالنسبة للحاج جمعة و معاه برضو الست سعاد اللي عايزين كل حاجة تبقي بالعقل ، لو النقاب حتة قماش طيب ماهو الحجاب حتة قماش مش خشب فيبقي الست تقلع الحجاب برضو ، و لو الشكل مش جزء من الدين يبقي ممكن نمشي عريانين و نقول اهم حاجة القلب ، اما بالنسبة للي عايزين يدخلو العقل في كل حاجة الرد عليهم ببساطة ان سيدنا علي قال ان لو كان الدين بالعقل فكان المسح علي باطن الخفين اولي من ظاهرهما ، و لو ان الدين بالعقل كانت ام سيدنا موسي لما خافت علي ابنها و ربنا امرها انها تلقيه في اليم كانت ببساطة قالت لأ لان العقل بيقول كده بس الفرق انها فاهمة ان الشرع مافيهوش تفكير و لما نفذت الامر كان التمكين لها و لسيدنا موسي ) ، ( ياريت نتعلم يا ست سعاد من الناس اللي بتفهم ، و نصيحتي للرجالة اللي كانو قاعدين : تشبهو بالرجال ان لم تكونو مثلهم ...ان التشبه بالرجال فلاح ) .

ناس بتبني و واحد بيهد

يمكن الموضوع يكون قديم شوية ، بس السؤال جه في دماغي و حبيت اطرحه ، هو ممكن واحد يهد اللي الناس كلها بتحاول تبنيه ؟ . هو ده اللي شيخ الازهر عمله في وضوع النقاب و انا مش واقف علي موضوع النقاب بالذات انا بتكلم علي المبدأ و بشكل عام ، و ازاي فعلا ممكن واحد يبوظ تفكير شعب و يجبرهم علي رأيه بقرار واحد . المشكلة ان القرار ده كالعادة بيتكاثر ذاتيا (ايه الكلام الكبير ده ) انا قصدي انه بيتبني عليه قرارات كتير و بيبقي هو البذرة لكل ده ، يعني مثلا شفنا دكاترة في الجامعة بيمنعو المنتقبات انهم يدخلو المحاضرات و السكاشن ، و طلع قرار تاني يمنع المنتقبات من دخول الامتحانات ، و خد من ده كتييير . فبقت المشكلة اما يقلعو النقاب علشان يكملو تعليم او يتمسكو برأيهم (بدينهم) و طظ في التعليم ، وللاسف القرار مش سهل ، بس السؤال هنا : لو حبينا نضحي يبقي بالدين وللا التعليم ؟، و اوعي حد يقول ان الحل في المظاهرات لاني من ساعة ما اتولدت و انا بشوف كل يوم مظاهرة شكل و طبعا من غير نتيجة ، و تعالو نحسبها و هضرب مثل يقرب الموضوع : لو حبيت اتعلم العوم بس في مكان فيه سمك قرش و حبيت اختار حل من التلاته ( اني انزل و اعافر مع القرش و اللي يحصل يحصل و ساعتها النتيجة معروفه ، و للا اقف اعمل مظاهرة علي الشط يمكن القرش يخاف و يهرب ، و للا احاول اشوف القرش بيفكر ازاي و احاول و اكون اذكي منه علشان اقدر اصطاده و بعدها ابقي انزل اتعلم ) و كالعادة كلنا عارفين الحل بس بنعمل مش شايفين ، و اظن اننا لو حبينا نعترض علي اللي مش عاجبنا بالمظاهرات يبقي هانبات في الشارع ، علي العموم اللي يحب يتعلم العوم ماينساش يجيبلي حته من القرش علشان اعملها فيليه بيقولو ان طعمه جامد .

أزمة دبي سعادة ، الدروس المستفادة

اليومين اللي فاتو كلنا شفنا ازمة دبي و شفنا ازاي الكيان الكبير ده كان ممكن يقع في لحظة لولا حاجات كتير منها الاصرار و وقوف امارة ابو ظبي جنبها وده يخلينا نرجع ونقول : ( ان الوقوع في لحظة اسهل بكتير من الجري ساعتين ) . بس الشاطر هو اللي يقف تاني علي رجليه و يكمل طريقه و يتعلم من اللي حصله . و هو ده بالظبط اللي الشيطان بيحاول يعمله معانا ، انه يخليك ماشي في الطريق لربنا كويس اوي و يـيـجي مرة واحدة يكعبلك و يشوفك هاتعمل ايه ، ياتري هتقعد في الارض و تفكر في الالم و ماتقدرش تقوم ، وللا هتقوم و تنفض هدومك مع احساسك بالكسوف من اللي حصل و تكمل طريقك لربنا ( وهو ده المطلوب ) . بس خد بالك انك لو كملت الطريق لواحدك هتمشي في الطريق و انت بتعرج و ده هياخد منك وقت و مجهود كبير منك و ممكن ماتقدرش تكمل لواحدك ، علشان كده حاول تلاقي حد سليم يقدر يسندك في الطريق ( بس المهم انه يكون طريقه هو طريقك ) . و علشان تضمن انك ماشي في الطريق الصح هاتبقي محتاج دليل فاهم تمشو وراه . وخد بالك ان الشيطان اللي ساعدك كتير في الطريق الغلط استحاله يسيبك بسهولة و انت ماشي في الطريق الصح ، و دايما خليك فاكر ان القرار هو اول خطوة علي الطريق ؛ (خد القرار ) .

مش عارف مالي

كتير بنقول الكلمتين دول لما بنحس بخنقة او ملل و ممكن ما نبقاش عارفين السبب . ممكن بنبقي عايزين نفضفض او نغير جو او حتي نروح لدكتور نفسي ، مع اني مستغرب جدا من الدكاترة النفسيين بتوع اليومين دول ، تلاقي الدكتور من غير ما يسمع اللي قدامه يكتب له دواء ، وهو من امتي الخنقة علاجها دواء ؟ ، (يمكن في اللحظة دي الدكتور ما بيبقاش قادر يفرق بين الخنقة و البواسير ) ، و للاسف كل ده بيزيد الطين بله عند المريض . مع ان الحل بسيط : كلنا عارفين ان احسن مكان ممكن نصلح فيه اي حاجه هو التوكيل او المكان اللي اتصنعت فيه الحاجة دي لانه بيبقي ادري من غيره بالحاجة اللي صنعها ، طيب لما نحب نصلح نفسنا او نعالج الروح اللي احنا مش شايفينها اصلا بس حاسين بيها تفتكرو نروح فين ؟ .وليه مش عارفين ان زي ما احنا بنجوع و بناكل برضو النفس بتجوع و بتبقي عايزة تاكل ، بس تاكل ايه ؟ ، طيب ليه كلنا عارفين ان احنا مالناش غير ربنا اللي خالقنا وادري بينا من نفسنا و قاعدين نبعد عنه بدل ما نروح له ؟ ، طيب ليه كلنا عارفين الاجابة و بنهرب منها ؟ الاجابة ببساطة : اننا ممكن مانحبش الادوية و كتير مننا بيخاف من الحقن بس بنجبر نفسنا علي اننا ناخدها علشان نخف ، طيب ما نجبر نفسنا ( اللي هي اصلا امارة بالسوء ) علي انها تقرب من ربنا ، بس المهم تكون عارف من جواك ان ماحدش راح لربنا و ربنا خذله ابدا ، و دايما خليك فاكر : ( من ادام الطرق علي الباب فتح له ).

تجيش نجيش

انا عارف ان الموضوع ده صعب شوية لانه مبني علي التخيل و بالذات بالنسبة للبنات . بس تخيل انك في الجيش و بتتعامل مع ناس غير الناس ، و بتسمع كلام غير الكلام و بتعمل حاجات غير الحاجات ، ساعتها بس لو طلت انك تدفع كل اللي حلتك علشان ترجع للدنيا بتاعتك مش هاتقول لأ . المشكلة اننا مابنعرفش قيمة الحاجة غير لما بتروح مننا ، طيب ماتيجو نعرف قيمتها و هي معانا و نعتبر اننا في الجيش من غير ما ندخله ، ماتيجو نرضي اهلنا اللي احنا مزعلينهم و نشوف لو احنا من غيرهم هانعمل ايه ، طيب ماتيجو نصالح الناس و اصحابنا اللي حاولو ينصحونا ( واحنا قلنا : يبقو ينصحو نفسهم الاول ) و نشوف لو احنا من غيرهم هانعمل ايه ، طيب ما تيجو نرضي ربنا الاهم من كل دول ، علي الاقل لو كل دول سابونا ربنا مش هايسيبنا ، و يوم ما تحس انك بقيت لوحدك تلاقي ربنا معاك .

شاب مفلس ، بنات بتعنس

زمان لما كنا بنسأل العيل الصغير (نفسك تطلع ايه؟) كان بيقول (طيار ، دكتور ، مهندس) بس لما بيكبر و بيصطدم بالواقع (حلوة يصطدم دي) بيعرف ان مش كل اللي بنتمناه بنلاقيه . علشان كده لما بنسأل الشاب دلوقتي (نفسك في ايه؟) تلاقيه نفسه يتجوز بنت عادية و في شقة عادية و بشغل عادي و مع كل ده مابيقدرش يتجوز برضو ، و بقي الجواز عنده حلم مش حقيقة . العجيب ان زمان كانت المعادلة ( شاب + بنت =جواز ) دلوقتي بقت ( شاب + بنات كتييير = حلم قومي اسمه الجواز ) طيب ازاي ؟ . ماهو يا إما المشكلة في البنت او في الشاب او تبقي المشكلة في السواق (علي رأي عبد الوهاب في الفيلم ) . طيب ماسألناش نفسنا ليه المعادلة اتغيرت و بقت البنات الكتير دول قاعدين من غير جواز. بالنسبة للشاب اول ما بيتخرج بيدور علي شغل و لو لقاه بيبقي بمرتب يادوب يقدر يتنفس بيه و مع ذلك بيرضي و ما بيقفش و بيكمل و بيقول بكره تتعدل . لحد ما بيصطدم بالواقع (تاني) لما بيروح لبنت و يلاقي اهلها عايزين شقة زي شقة بنت ابن خالة عمها و عايزين يفرشو الشقة زي بنت عمة جوز اختها و تبدأ الطلبات تزيد و ياعيني مع كل طلب الواد وشه بيجيب الوان و نفسه بيضيق و عينه بتدمع و بتطلب معاه اسهال و برضو بيقول لسه في امل . و اول الشاب ما بيبدأ يتكلم و يقول : انا نفسي اعمل لها كل ده طبعا بس .....، تلاقي ابوها وشه احمر و قال له : هو احنا فينا من بس و هو ايه اللي مش عاجبك في اللي احنا قلناه ؟ ،فالشاب يرد :يعني لو ينفع اجيب شقة صغيرة بدل الخمسين اوضه و عشرين صاله ، وبدل العفش اللي هاييجي من بره ممكن نجيبه من دمياط ، و بدل الشبكة ام خمسين الف كفاية دبلة و اسورتين زي (الكلابشات) قصدي زي اللي اخت صاحبي جابتهم . فجأة تلاقي الراجل وشه اتقلب و بدل كلمة يابني بقي بيقول حضرتك (طبعا بتريقة مش احترام) و بيبدأ يتفتف في الكلام وعينه بتبقي احمر و اسود ، ولما بيبص الشاب للعروسة بنظرة استعطاف (و شحاته) بيلاقيها موافقة علي طلبات اهلها و بتبص له من فوق لتحت ، و لو البنت بقت في صف الشاب يادوب بتقول له : معلش حاول ، و كأنها واخدة حقنة بنج ومش حاسة باللي الشاب فيه . طيب خليكو قاعدين بقي لحد ما تكبرو و تأتبو و ساعتها هتتنازلو و تتجوزو ابو رجل مسلوخة !!!!!.

مآذن و أقزام

كنت بحاول اربط بين الأحداث الأخيرة و بعضها و كان اهم الاحداث دي :(النقاب في مصر ، ماتش الجزائر في الخرطوم ، المآذن في سويسرا). و حبيت اشوف احنا اتعاملنا ازاي مع الاحداث دي ، ولما بقول (احنا) فأنا بتكلم عن الناس البسيطة و الغلابة (بتوع القهاوي ، الجرايد ، الشات ، برامج التليفزيون و غيره) . لما حصل موضوع النقاب في مصر سخنت الدنيا يومين و هدت كالعادة ، و لما حصل موضوع الجزائر سخنا برضو يومين وهدينا تاني ، بس الفرق ان اليومين بتوع ماتش الجزائر كانو اكتر و اهم بكتير عند الناس من موضوع النقاب . و فجأة لقينا التعلب اللي كان مستخبي و مستني الفرصة اللي يهجم فيها و المرة دي كان التعلب في سويسرا اللي بتحاول تهدم رمز من رموز الاسلام . تعالو نحسبها صح : موضوع النقاب بين لهم ان احنا بنسخن يومين و بهندا تاني حتي لو في موضوع يخص الدين ، و موضوع الجزاير بين لهم ان احنا كشعوب ممكن نختلف علي ابسط الامور حتي لو الموضوع يخص الكورة ، ( فيبقي اخواتنا في مصر بيهدمو رمز للاسلام و هو النقاب ، وولاد عمنا بيهدمو رمز الوحدة لسبب تافه و هو الكورة ، طيب ليه الغريب في سويسرا ما يستغلش ده بأنه يأثر علي الاسلام من خلال رموزه هناك ) و اظن ده التطور الطبيعي للحاجة الساقعة قصدي للاحداث ( اخواتنا ، ولاد عمنا ، الغريب ).طيب ايه الحل؟؛ طبعا و لأن احنا بتوع الكورة لازم نحط خطة وهي : اننا نسد الجهة الشمال اللي بيهاجمونا منها و نكثف عددنا فيها ( وده ببساطة بإننا نفهم ديننا اكتر و نعمل بيه و منتفرقش مهما حصل ) ، ( و دي و الله مش شعارات ، بس اللي يخلي العالم كله يحارب الاسلام و المسلمين ده مايخليناش نهتم بيه اكتر ؟) . و زي ما بيقولو ان الاسلام زي الكورة المطاط كل ما بيحاولو يضربوها في الارض بيعلا اكتر لفوق ، نفسي نمنعهم يضربوه في الارض و نحدف الكورة احنا لفوق بإيدينا .

جيفارا دخل الحارة

كان يا مكان و بعد السلام وهاي و بيس يا مان . كان في واحد اسمه جيفا قصدي جيفارا و كان غلبان مش لازم في الفلوس بس ده في عقله كمان ، ماكانش عاجبه لا حلال و لا حرام اصله ماكانش عاجبه دين من الاديان ، و كان علي ايامه ظلم و طغيان بالذات علي الناس اللي كانو بيزرعوا سواء في ارضهم او ارض السلطان ، فحب يعمل ثورة و حط ايده في ايد اللي زيه و من بعدها بقي اشجع الشجعان ( وده طبعا رايهم فيه بس ده عند ام ترتان). انما عندنا الاسلام هو الميزان . لو شفنا ايام ابو جهل هنلاقي انه كان بيدافع عن قضية كفرية و ماكانش عايز الاسلام ينتشر في اي مكان ، واتباعه كانو بيساندوه و كأنه مناضل برضو ( بس من امتي صاحب الكفر بيبقي صاحب فكر ) . و ازاي واحد بيحارب ربنا ينصر الغلابة ازاي . الغريبة ان الشباب معجبين باللي اسمه جيفا ده و هما مش عارفين عنه اي حاجة ودخل حوارينا و بقي رمز لكتير من الشباب بالذات بتوع السيجارة و اللبان ( هو من امتي المزابل و الخرابات بتطرح ورد وفل و ريحان ). و للأسف سيبنا رموزنا اللي هدفهم توحيد الرحمن و نصروا الضعيف وواسو المريض ووقفو مع الغلبان ، و الله حاجة تكسف يبقي الطريق قدامنا واضح و رايحين نمشي ورا واحد حيران...و توتة توتة فرغت الحدوتة حلوة و للا ياريت اللي جري ما كان؟ .

ابعد عن الدوشة

1-دايما لما نلاقي حد اعصابه تعبانة و عايزين نهديه نقول له (ابعد عن الدوشة)
2-الشاب اللي عايز يتجوز و بيلاقي كل الناس اللي حواليه بيقولوله ازاي و منين و خليك من غير جواز احلي و البنات كتير لما تزهق منهم ابقي اتجوز بقول له (ابعد عن الدوشة)
3-البنت اللي بتعرف ده و بتضحك لده و بتهزر مع ده و مش عارفة انها بترضي رغبات شباب فاضي علي حساب نفسها بقول لها انتي قليله اوي في نظرهم مش زي مانتي فاهمة و (ابعد عن الدوشة)
4-الست المتجوزة و حاسة ان جوازها كان اكبر غلطة في حياتها و المشاكل مابتخلصش بقول لها: كانو زمان بيقولو ان الست عندها اسلحة فتاكة مش عارف ليه الاسلحة دي بتبقي اسلحة فاسدة لما بتستخدمها مع جوزها ؛ الراجل ده لو كان مش جوزك و حبيتي توقعيه هاتجيبيه علي بوزه طيب جربي توقعيه و هو جوزك و اوعي تسيبي نفسك لنفسك و (ابعد عن الدوشة)
5-الراجل اللي كان اقصي امانيه انه يطلع بطاقة عائلية و بعد ما اتجوز بقي عامل زي العيل اللي كان نفسه في لعبة ولما بقت بتاعته زهق منها وبيبدأ يكسر فيها بإيده و ميعرفش ان الجواز مش لعبة يا راجل خليك راجل و (ابعد عن الدوشة)
6-الابن اللي مابيخدش بنصيحة اهله ميعرفش ان اكبر شركات في العالم لما بيطلبو حد يشتغل عندهم بيشترطو الخبرة و انت رايح تاخدلي بنصيحة واحد صاحبك لسه متخرج في الحياة و سايب نصيحة اهلك اللي عندهم خبرة وخايفين عليك من غير مقابل يابني (ابعد عن الدوشة)
7-الاب و الام اللي راميين ولادهم و مبيسألوش عنهم و عن اصحابهم و لا اللي بيعملوه بحجة انهم متربيين و واثقين فيهم بقي في حد برضو يحط النار جنب البنزين و يبقي مطمن ان الدنيا مش هتولع فيه سيبكو بقي من اللي انتو فيه علشان الدنيا ماتولعش فيهم و (ابعد عن الدوشة)
8-الشاب اللي بيدافع عن صاحبه اللي هو سبب المصايب اللي هو فيها و مش قادر يستغني عنه وحس ان الدنيا كلها واقفة في وشه بسبب اللي بيعمله يابني ده الراجل اللي قتل ميت نفس و حس ان الدنيا قفلت في وشه ما قالش ان قلبي مات خلاص و مفيش فايده . الراجل اتحرك وراح ياخد بنصيحة الناس اللي فاهمة بس المهم ان في ناس حاولت تهبطه برضو ماسكتش و راح للي احسن منهم .و كانت اول نصيحه صح له انه يسيب قريته باللي فيها و (يبعد عن الدوشة)

حب الشباب

طبعا حب الشباب مش اللي بيطلع في الوش انا قصدي علي الوهم اللي بيقع فيه الشباب و بيفتكروا انه حب .
الغريبة ان البنات نفسهم يحبوا قبل الجواز و ده لانهم عاتشفيين بطبعهم و ميعرفوش ان الشباب مبيفكروش بنفس الطريقة لان الشاب عارف انه صعب يتجوز وهو في الجامعة ( او حتي بعد الجامعة) فبيحب يملا الفراغ اللي عنده بأنه يعرف واحدة ويعيش معاها يومين بحجة الوهم اللي اسمه حب و طبعا مع كتر الكلام بينهم الوهم بيزيد اكتر .
و علي رأي اللي قال:اتاني هواها قبل ان اعرف الهوي...فصادف قلبا خاليا فتمكنا
و الدليل علي كلامي ان الموضوع كله وهم انه معظم الحالات دي مابينتهيش بجواز وكل واحد بيروح لحاله
و بتبقي ذكري و زي عنترة بن شداد ماقالش: و اهو بكرة نقول كانت ذكري و عشنالنا يومين) . و بيرجع يتجوز بالطريقة المعتادة بإن اهله يشوفوله عروسة تعجبه و بيتجوزها و يحبها و الحياة بتستمر
و لما بيقابل ابو المعاطي صحابه يقعد يحكي ليهم علي تفيدة اللي كانت معاه في السكشن و اداها بمبة قبل تاني امتحان
و حاولت تنتحر بسم فران بس للاسف عمل معاها نتيجة عكسية و زودلها هرموناتها و بقت بتزغلل في عنين الشباب اكتر و رجعت عن اللي في دماغها بس برضو تفيدة هي اللي خسرانة في الاخر.
علي الاقل تمن السم اللي حاولت تنتحر بيه و ماجابش نتيجة